Nəhəng Google şirkəti, daha doğrusu, onun gizli laboratoriyaları ancaq
filmlərdə gördüyümüz gələcəyi göstərən əsl eynəklərin yaradılması
üzərində iş aparır. Bu eynəklər reallığı müxtəlif ipucları ilə doldurur
və ümumiyyətlə əsl XXI əsri göstərir. Artıq Amerika küçələrində yeni
texnologiyanın ilk sınaqları baş tutub.
Əsas xəbər ProjectGlass layihəsi ilə bağlıdır: bu eynəkləri taxarkən
Robokopa çevrilmirsiniz. Tam tərsinə- eynəyin çərçivələri olduqca
səliqəli şəkildə minimum komponentlərlə işlənib və yeganə kiçik şüşəsi
ilə müasir meqapolislərin küçələri ilə tam ahəng təşkil edir. Google xüsusi hazırlanmış videorolikdə ProjectGlass eynəklərinin necə
istifadə olunmasını nümayiş etdirib: Səhər oyanırsınız, kofe
dəmləyirsiniz, eyni vaxtda sizin bu unikal eynəyiniz sizə havanın
temperaturunu göstərir. Sonra evdən çıxırsınız, metroya yaxınlaşırsınız,
eynək metronun bağlı olduğunu və başqa nəqliyyat vasitəsindən istifadə
etməyiniz üçün sizi xəbərdar edə bilir. Daha sonra siz ProjectGlass
eynəyinin köməyi ilə səs sorğusu edərək yaxınlıqda olan dostlarınızı
tapa bilərsiniz. Videozənglər, məlumat göndərmək, şəkillər hazırlamaq və
onları dərhal sosial şəbəkələrdə yerləşdirmək və hətta musiqi
mağazalarında sevimli müğənnilərinizin disklərini tapmaq üçün sizə yol
göstərir.