Dünən İspaniya La Liqasında 32-ci turun qarşılaşmaları keçirilib.
Dünənki qarşılaşmaya qədər artıq əzəli rəqibi
"Barselona" ilə aralarındakı xal fərqi birə enən Madrid "Real"ı, daha
bir sensasiyaya imkan verməməli və çətin də olsa qələbə qazanmalı idi.
Səfərdə "Atletiko Madrid" klubu ilə qarşılaşmadan ancaq və ancaq qələbə
ilə ayrılmağı planlaşdıran kral klubu, bunu artıqlaması ilə bacarıb.
Belə ki, meydanda 90 dəqiqə ərzində özlərini heç də qonaq kimi aparmayan
"Real" futbolçuları, Arda Turanın komandasına 4:1 hesabı ilə qalib
gələrək, "Barselona"nın arzusunu gözündə qoyublar. Portuqaliyalı futbol
ulduzu Kriştiyanu Ronaldonun 3 qol vurduğu qarşılaşmada, "Atletiko"lu
futbolçular heç nə ilə yadda qalmayıblar. Başqa bir qarşılaşmada
"Qranada" "Atletik" Bilbaonu 4:1 hesabı ilə, "Sportinq" isə "Levante"ni
3:2 hesabı ilə məğlub edib.