Martın 27-də futbol üzrə Çempionlar Liqasında (ÇL) ¼ final mərhələsinin ilk oyunlarına start veriləcək.
Lent.az-ın məlumatına görə, turnirin əsas sensasiyası sayılan Kipr
APOEL-i İspaniyadan olan qorxunc rəqibi "Real Madrid”i qəbul edəcək.
Günün digər qarşılaşmasında Portuqaliya "Benfika”sı İngiltərənin "Çelsi”
klubunu sınağa çəkəcək. 23:45. APOEL (Kipr) – "Real Madrid” (İspaniya)
Baş hakim: Feliks Brıx (Almaniya)
"Biz inanılmazı reallaşdırmışıq. Bu, bir daha təkrarlanmaya bilər”.
APOEL-in prezidenti Fivos Erotokritu komandasının bütün Avropanı
təəccübləndirdiyi mövsüm barədə danışarkən belə deyib. Bu gün "GSP”
stadionunda Nikosiya komandası tarixində ən vacib oyun keçiriləcək. Amma
"Real Madrid”i də yüngül gəzinti gözləmir. Çünki APOEL cari ÇL
mövsümündə 7 ev oyunundan 5-ini qələbə ilə başa vurub. "Kral klubu”nun
da ideal statistik göstəriciləri var. Baş məşqçi Joze Mourinyonun
komandası 8 oyuna 7 qələbə qazanıb. "Real Madrid” yalnız 1/8 final
mərhələsində Rusiya MOİK-i ilə Moskvadakı ilk görüşdə büdrəyib – 1:1.
Mourinyonun özü isə ÇL-də 4 dəfə ¼ final oyununa komanda çıxarıb və
hamısında uğur əldə edib. "Real Madrid”in digər üstünlüyü Kriştianu
Ronaldudur. Portuqaliyalı hücumçu turnirdəki son 4 matçında 5 qol vurub.
23:45. "Benfika” (Portuqaliya) – "Çelsi” (İngiltərə)
Baş hakim: Paolo Talyavento (İtaliya)
"Benfika” son 22 ildə ilk dəfə yarımfinala çıxa bilər. Baş məşqçi Jorj
Jezuşun komandası Avropa kuboklarında axırıncı 10 ev oyununda uduzmayıb
və bu seriya 2010-cu ilin dekabrından davam edir. Lissabon komandası da
"Real Madrid” kimi 1/8 finalda Rusiya təmsilçisini üstələyib. "Zenit”lə
səfər qarşılaşmasında 2:3 hesabı ilə məğlub olmasına baxmayaraq,
"Benfika” "Eştadiu da Luj”da 2 cavabsız qolla mərhələ adlayıb. "Çelsi”yə
gəldikdə, İngiltərə Premyer Liqasındakı uğursuzluqlarına rəğmən,
ölkəsinin ÇL-dəki yeganə təmsilçisi kimi qalır. "Zadəganlar” 1/8 final
mərhələsinin ilk matçında "Napoli”yə 1:3 hesablı məğlubiyyətdən sonra
turnirlə vidalaşmağa çox yaxın idilər. Lakin sonradan portuqaliyalı baş
məşqçi Andre Villaş-Boaş istefaya göndərildi. Onu əvəzləyən Roberto Di
Matteonun rəhbərliyi altında isə "Çelsi” cavab görüşünün əlavə vaxtında
növbəti mərhələyə vəsiqə gətirən qələbəyə nail oldu – 4:1.
Qeyd edək ki, hər iki oyunun başlama saatı Bakı vaxtı ilə göstərilib.