"Barselona”nın baş məşqçisi Xosep Qvardiolanın istefasından sonra klubun yeni baş məşqçisinin adı açıqlanıb.
Xarici mətbuata istinadən verilən xəbərə görə, klubun yeni baş məşqçisi Qvardiolanın köməkçisi Tito Vilanova olub.
İspaniya liqasında "Real Madrid”ə məğlub olduqdan sonra çempionluq şansını itirən "Barselona”, bir neçə gün öncə də Çempionlar Liqasının yarımfinalında "Çelsi”yə uduzaraq böyük şok yaşamışdı. Məğlubiyyətlərdən sonra baş məşqçi Qvardiola vəzifəsindən getdiyini açıqlamışdı.
"Barselona”nın prezidenti Sandro Rossel Qvardiolanın yerinə Tito Vilonovanın gətirildiyini açıqlayıb.
Qeyd edək ki, Qvardiola 2008-ci ildən klubda baş məşqçi fəaliyyətinə başlamışdı. "Barselona” Pepin başçılığı ilə 3 dəfə ölkə liqasının, 2 dəfə Çempionlar Liqasının, ümumilikdə isə 12 kubokun qalibi olub.
Qvardiolanın İngiltərə yığma komandasının və yaxud da "Çelsi”nin baş məşqçisi olacağı güman edilir.