"Bakcell” MMC və "Azercell Telekom” MMC şirkətlərinin növbəti məhkəməsi aprelin 18-nə təyin olunub.
Qeyd
edək ki, aprelin 4-dən etibarən Ali Məhkəmədə hər iki mobil operatorun
kasasiya şikayətləri əsasında məhkəmə prosesi başlayıb.
Xatırladaq ki, əvvəlcə "Baksell Ltd”
MMC şirkəti "Azercell Telekom” MMC şirkəti ilə aralarında bağlanan
operatorlararası arabağlantı tarifi üzrə müqaviləyə əlavənin bağlanmış
hesab olunması, qarşılıqlı hesablaşma aktlarının etibarsız sayılması və
vurulmuş zərərin tələb edilməsi barədə iddia ilə 1 saylı Bakı İnzibati
İqtisad Məhkəməsinə müraciət edib. İddiada
göstərilib ki, Rabitə və İnformasiya Texnologiyaları Nazirliyi 2009-cu
aprel ayından etibarən arabağlantı tarifinin 2 qəpik səviyyəsində tətbiq
edilməsi barədə qərar qəbul edib. Lakin "Azercell Telekom” MMC tarif
qiymətini dəyişdirməyib. Bunun nəticəsində şirkətə maddi ziyan dəyib.
Məhkəmə "Bakcell Ltd” MMC-nin
şikayətini təmin edərək, arabağlantı tarifinin 2009-cu ilin aprelindən
etibarən 1 dəqiqəsi 2 qəpikdən hesablanmasını və "Azercell Telekom” MMC
tərəfindən iddiaçıya yaranmış borcun ödənilməsi barədə qətnamə qəbul
edib.
Bundan narazı qalan "Azercell Telekom”
MMC apelyasiya şikayəti verib və Bakı Apelyasiya Məhkəməsi birinci
instansiya məhkəməsinin qətnaməsini qismən ləğv edərək, yeni qətnamə
çıxarıb. Həmin qətnamə ilə razılaşmayan şirkətlər kassasiya şikayəti ilə
Ali Məhkəməyə müraciət ediblər.