Milli.Az Cənub TV kanalına istinadən xəbər verir ki, bu körpü
Ələt-Astara magistral yolunun tikintisi ilə əlaqədar salınır. Həmin
istiqamətdə iki körpü olsa da, yalnız birindən istifadə olunur. Məhz
işlək körpünün üzərindən nəqliyyat vasitələri Ələt-Astara istiqamətində
hərəkət edə bilir.
Mürəkkəb konstruksiyaya malık olan yeni
körpünün tikintisi "Azərkörpü” açıq səhmdar cəmiyyəti tərəfindən həyata
keçirilir. Tikinti meydançasına 30-dan çox müxtəlif təyinatlı texnika və
220 nəfərlik işçi qüvvəsi cəlb olunub. Bunların da əksəriyyəti
körpüsalma sahəsində əsl mütəxəssislərdir. Çuxanlı kəndi ərazisində
tikilən yeni körpünün uzunluğu 361 metr, asma hissəsi isə 150 metr
olacaq. Bundan başqa, körpünün 5 aşırımlı olması nəzərdə tutulub. Kür
çayının sağ və sol sahilini birləşdirəcək yeni körpünün eni 30 metr
olmaqla 4 zolaqlı yoldan ibarət olacaq.
Azərbaycanda analoqu
olmayan bu asma körpü ən yeni standartlara cavab verəcək. Qısa müddətdə
"Azərkörpü”nün mütəxəssisləri tərəfindən xeyli iş görülüb. Yeni körpü
bir sıra özəllikləri və üstünlükləri ilə digərlərindən fərqlənir.
Hazırda 6 dayaqdan 3-ü tam hazırdır, digər dayaqlarda da son tamamlama
işləri görülür. Smeta layihə dəyəri 35 milyon manat olan yeni asma
körpünün 2013-cü ilin əvvəlinə kimi tikilib istifadəyə verilməsi nəzərdə
tutulub. O vaxta kimi Ələt-Astara magistral yolunun yeni hissəsinin də
tikintisi tam başa çatdırılacaq.