Azərbaycanlı müğənni Elçin Hüseynov klipindəki erotik görüntülərdən
imtina etdi. Milli.az xəbər verir ki, müğənni pərəstişkarlarının qınaq
hədəfinə tuş gəlməmək üçün bu addımı atıb. Elçin Hüseynov repertuarında
yer alan "İki ürək” mahnısına çəkdirdiyi klipə görə bəzi peşmançılıqlar
yaşayır.
Açıqlama verən müğənni, ilk dəfə olaraq baş verənlərə aydınlıq gətirdi:
"14 il tamam oldu ki, mən professional səhnədəyəm və yetərincə dinləyici
auditoriyası qazanmağa müvəffəq olmuşam. İnanın, tamaşaçılarımın kəskin
reaksiya göstərəcəyini layihə müəllifi, tanınmış radio dj Kazım
Bağırova da söyləmişdim. Bəli, mən də haradasa, bunu etirazla
qarşılayıram. Lakin bir "əmma" var, o, da peyk vasitəsilə izlədiyimiz
Türkiyə seriallarında açıq-saçıq səhnələrə rahat oturub baxmağımızdır.
Necə olur ki, "Aşkı-memnu”, "Fatmagülün suçu ne?” kimi seriallarda bəzi
erotik səhnələri pisləmirik? Yenə də vurğulamaq istəyirəm ki, etirazla
qarşılanan "İki ürək” mahnısına çəkilən klipdə yataq və öpüş səhnələrini
aktyorlar oynayıblar. Rejissorluğunu Nail Naiboğlunun etdiyi ekran işi
hazır olsa da, biz yenidən montaj işlərini davam etdirməyi lazım bildik.
Və həmin erotik səhnə kimi qəbul edilən görüntülər kəsilərək
götürüldü”, - Hüseynov fikirlərini belə izah etməyə çalışdı.
Qeyd edək ki, mahnının sözləri Azər Şirinə, musiqisi Elçin Cəfərova
məxsusdur. Yaxın günlərdə müğənni həm hazır klipi, həm də eyniadlı
musiqi toplusunu təmətəraqlı şəkildə təqdim edəcək.