Həzrət Əlinin (ə) Hikmətli Sözlərindən

Tarix: 19.05.2024, 21:20

Həzrət Əlinin (ə) Hikmətli Sözlərindən

1. Tamah və hərisliyi öz şüarı etmiş kəs özünü kiçildib. Öz çətinlik və pərişanlığını bildirən kəs zillət və xarlığa qol qoyub. Dilini özünə hakim etmiş kəs öz yanında da xar və zəlildir.

2. Xəsislik ardır. Qorxaqlıq nöqsan və çatışmamazlıqdır. Kasıblıq zirək şəxsi dəlil və sübutunu bəyan etməklə lal və dilsiz edir. Yoxsul öz şəhərində qəribdir. Acizlik bəla və biçarəlikdir. Səbr şücaətdir. Zahidlik sərvətdir. Günahlardan uzaqlıq qalxandır.

3. İlahi təqdirə razı olmaq gözəl yoldaşdır. Elm müqəddəs və əziz bir mirasdır. Gözəl xasiyyətlər təzə və yeni zinətlərdir. Fikirləşmək pak və təmiz güzgüdür.

4. Ağıllı adamın sinəsi onun sirlərinin xəzinəsidir. Gülərüzlülük və yaxşı xasiyyətlilik dostluq tələsidir. Çətinliklərə dözüb səbr etmək pisliklərin örtüyüdür. Sülh və barışıq eybləri örtməkdir.

5. Özündən razı kimsəyə qəzəb edən çox olar. Sədəqə xeyirli və şəfaverici dərmandır. Bəndələrin dünyadakı əməlləri axirətdə gözləri önündə olacaq.

6. Bu insana heyrətlənin ki, piylə (göz ilə) görür, ətlə (dil ilə) danışır), sümüklə (qulaq ilə) eşidir və dəlik (burundan) nəfəs alır.

7. İnsanlarla elə qaynayıb-qarışın və rəftar edin ki, əgər həmin halda ölsəniz sizə ağlasınlar və əgər sağ qalsanız sizinlə ünsiyyətdə olmağa can atsınlar.

8. Düşmənini ələ keçirən zaman onu bağışlayaraq günahından keçməyi ondan üstünlük qüdrətinin şükrü et.

9. İnsanların ən acizi dost tapmaqda aciz olan kəsdir. Ondan daha acizi isə qazandığı dostlarından birini itirən kəsdir.

10. Nemətlərin nümunələri sizə çatanda şükrün azlığı ilə onun qalan hissəsini uzaqlaşdırmayın.

11. Çox yaxın qohumların tərk etdikləri şəxsə çox uzaq olan yad çatar.

12. Fitnə və bəlaya düçar olmuş hər bir kəsi məzəmmət etmək olmaz.

13. Hər kim arzusunun dalınca qaçaraq cilovunu buraxsa ölüm ayağını sürüşdürər.

14. Comərdlərin səhv və xətalarından keçin. Çünki onlardan birinin ayağı sürüşən kimi Allahın əli onun əlində olur və onu qaldırır.

15. Qorxu ziyanla yoldaşdır və utancaqlıq ümidsizliyə birləşikdir. Fürsət ötəri bulud kimi keçir. Buna görə də gözəl fürsətləri əldən çıxarmayın.

Teq: Hezreti Eli

Mövzuya Oxşar Xəbərlər: